Psa 1 | KYG | STEP | Gotife'mo mono nosaya vaya'mogimo apakesamo afite'apae'mo, ina kate'mo viyo, hu'a nehaya kate'mo umenitata osuge hosu kava'mo nehaya vaya'mo ne'vaya kate'mo u'a he ti'a o'maige mono katefe'mo, afa kane, hu'a hute'a hu'a faipa hu'a ne'ataya vaya'e'mo magokepi lokae'a itopale'mo o'maige hu'a ne'maiya vaya'mogimo Goti aulagale'mo alagepa hu'a mai'nayanage'a afa'a apamogaga aigae.

Psalms 1

Alagepa vaya'e Gotife'mo mono nosaya vaya'efe'mo apava ge yokemae

1 Gotife'mo mono nosaya vaya'mogimo apakesamo afite'apae'mo, ina kate'mo viyo, hu'a nehaya kate'mo umenitata osuge hosu kava'mo nehaya vaya'mo ne'vaya kate'mo u'a he ti'a o'maige mono katefe'mo, afa kane, hu'a hute'a hu'a faipa hu'a ne'ataya vaya'e'mo magokepi lokae'a itopale'mo o'maige hu'a ne'maiya vaya'mogimo Goti aulagale'mo alagepa hu'a mai'nayanage'a afa'a apamogaga aigae. 2 Ani agufa kava'mo nosaya'monanafa Ala kava ne'mo ke'aepa ge'alefeke'mo amuse hute'a apamogaga ne'aiye. Apakaemo feluga'e hani'ilaga'e'mo ke'aepa ge'aeke'mo apakesa afifi hu'a ne'maiye. 3 Apakaemo ani ago'nanena folagapi'mo fai male'niya yosamo'mo alagamo ne'aeya afina'mo alagamo ne'aesigeno'ae'mo haita'amo falu noteya yosagana hu'a mai'nae. Muki ali'naya ali'ya'apimo'mo alagepa huno afole ne'aiye.

4 Hosu vaya'mo ani kava hu'a o'mai'nae. Apakaemo mago haleti'ya yakana hu'a mai'nae. Haleti ya'amo hale'nageno'ae'mo yasimo'mo alino halelino ne'viya haleti'ya yakana hu'a mai'nae. 5 Mai'naya'mofe'mo Gotife'mo mono nosaya vaya'mo agoti huno apatesiya yate'mo he ti'a o'mai'a alagi asagau'a aigae. Inagi hosu kava'mo nehaya vaya'mogimo fatago vaya'mo ali'a anupa hu'a maisayapi'mo u'a o'maigae. 6 Ala kava ne'mo'a fatago vaya'mogimo nehaya kava'apie'mo apakeno amuse huno ne'apateya'monanafa agaefe'mo mono nosaya vaya'ai ali'ya'apimo alino hano huno atalesige'a alagi lageso hugae.